Philippes, par la grace de Dieu roys de France. Savoir faisons à touz presens et à venir que, comme nos, à la requeste et supplication des hoirs ou aiens cause de feu Eude de Chalo, jadis eussiens certaines lettres dont la teneur est cy dessouz escripte confermées et faites seeler de nostre grant seel en cyre vert et en laz de soye, disans que ycelles lettres avoient esté si mal gardées que elles estoient pourries dedens un mur où elles avoient esté mises, que il n'y avoit demoré fors nostre seel : nous, à plus grant confirmation de savoir la verité, commeismes à noz amez et fealz gens des requestes de nostre Hostel à enquerre la verité sus ce, les quels, veuz deux vidimus sus nostre confirmation seelez du seel de Chastellet, et d'abondant examinez et fait jureir pluseurs tesmoings, c'est assavoir Jehan de Mercenson, Colin Buiset, Ernoul Bete, Johannin de Mercenson, Noëlet de la Fosse, Guillaume Moriau, Pierre Potin, Andry Sorgue, Jehan de la Fosse, Jehan Brocant et Guillaume Tube, qui tuit, chascun par soy, à eux exposé tout le fait et monstré les principaux lettres et vidimus dessus diz, jurerent aus saintes euvangiles touchées par eulz et chascun de eulz, et tesmoignerent eulz avoir veue la chartre de ladicte confirmation seellée de nostre grant seel en cyre vers et en laz de soye sainne et entière faite sur ce, contenant la fourme et la teneur des dictes lettres entiennes seellées des seels ès abbés jadis de Saint Magloire, de Saint Vitor et de Sainte Genevieve de Paris, et contenue ès diz vidimus de. Chastellet estraiz de nostre dicte confirmation perdue ou pourrie si comme dit est; la teneur des quelles lettres est telle :